मिलेनियम च्यालेन्ज कर्पोरेशन (एमसीसी) संसदबाट अनुमोदन भएको विरोधमा आह्वान गरिएको बन्दको अवज्ञा गरेको भन्दै बन्दकर्ताहरुले हेटौंडामा बल्कर गाडी (सिमेन्ट बोक्ने गाडी) आगजनी गर्नुको साथै एक ट्रकमा पनि तोडफोड गरेका छन् । एमसीसी पारित गरेको विरोधमा विप्लव नेतृत्वको नेकपासहित ६ वटा कम्युनिष्ट संगठन र दुई मोर्चाले सोमबार नेपाल बन्द आह्वान गरेका हुन् ।
बन्दकर्ताहरुले जिल्लाको हेटौंडा उपमहानगरपालिका वडा नम्बर–१५ रातोमाटेको शिवम् सिमेन्ट उद्योगतर्फ जाने सडकमा रिद्धि सिद्धि सिमेन्ट लेखिएको बल्करमा आगजानी गरेका हुन् । रातमाटेबाट रिद्धि सिद्धि सिमेन्ट उद्योग जाने क्रममा शिवम् सडकको पावर हायस नजिक बन्दकर्ताहरुले प्रदेश ३–०३–००१ ख ०१७५ नम्बरको बल्करमा खागजनी गरेका थिए । आगजनीबाट बल्करको अगाडीको भाग पूर्ण रुपमा क्षति भएको प्रहरीले जनाएको छ ।
त्यस्तै बन्दकर्ताहरुले हेटौंडा–१९ बस्तिपुरमा एक ट्रकमा तोडफोड गर्दै सडक अवरुद्ध पारेका छन् । बन्दकर्ताहरुले ना ६ ख ३४९१ नम्बरको ट्रकको सिसा फुटाएका छन् भने केही बेर सडक समेत अवरुद्ध पारेका थिए । हाल सो क्षेत्र प्रहरीले नियन्त्रणमा लिएको र सडक सुचारु गरेको जिल्ला प्रहरी कार्यलय मकवानपुरका प्रहरी नायव उपरिक्षक जयश्वर रिमालले जनाकारी दिए ।
उनका अनुसार अन्य केही स्थानमा सडक अवरुद्ध गर्न टायर बाल्ने काम बन्दकर्ताबाट भएका छन् । सामान्य अवरोध भएपनि अवस्था प्रहरीको नियन्त्रणमा रहेको उनले बताए ।
